O iPad sae á venda nos Estados Unidos o 3 de abril

Os estadounidenses poderán reservar o novo dispositivo a partir do 12 de marzo. O dispositivo chega a España a finais de abril.

Os «applemaníacos» poderán ter nas súas mans o novo iPad o próximo 3 de abril. Apple acaba de anunciar a data na que sae á venda o seu novo tablet pc nos Estados Unidos; ademais, a compañía de Steve Jobs abre o período de reserva anticipada o próximo venres, 12 de marzo.

O primeiro modelo de iPad que chegará ás tendas será o que conta con conectividade wifi, mentres que os modelos con wifi + 3G terán que esperar ata finais do mes próximo; o mesmo tempo que tardará en chegar o esperado aparello ao resto do mundo: o dispositivo comercializarase en España, Alemaña, Australia, Canadá, Francia, Italia, O Xapón, Suíza e Reino Unido a finais do vindeiro mes.

«O iPad é algo completamente novo», avanza Jobs. Por 499 dólares, este aparello permite navegar pola web, ler e enviar emails, compartir fotos, vídeos, oír música, ler libros electrónicos... Cun grosor de 13,4 milímetros e un peso de 680 gramos, ofrece ata 10 horas de autonomía de batería. No entanto, xa desde a súa presentación, o pasado 27 de xaneiro, este novo invento da tecnoloxía, que se atopa en camiño entre os teléfonos intelixentes e os computadores portátiles, tivo case tantos aplausos como apupos.

Fonte: La Voz de Galicia