A Sala de Innovación Tecnolóxica Empresarial da Fundación CEL (SITE) finalizou o Proxecto EmprendeTIC 2009 cunha xornada organizada coa axuda de AFRICOR LUGO e coa colaboración da Obra Social de Caixa Galicia e da CEL e dedicada a pór en relación as novas tecnoloxías e o agro, a, en palabras do presidente da Fundación, Luis García Santalla, “apoiar ao agro como actividade fundamental na economía galega”. Todas as solucións TIC da mesa desta mañá xiraron en torno a aplicacións informáticas, plataformas web e tecnoloxías probadas, accesibles e útiles para incrementar a rendibilidade do subsector gandeiro.

 

Foron uns cento cincuenta os asistentes ás charlas englobadas baixo o título “Implantación das TIC no medio rural. Todo o que necesito coñecer para mellorar a produción das explotacións mediante as novas tecnoloxías”. Comprobaron, polo tanto, cales son as propostas existentes na actualidade para conseguir nas granxas aforro, novas canles de comercialización e eficiencia enerxética.

 

Os seis relatores invitados presentaron ante o auditorio os seus proxectos, dalgúns dos cales houbo demostracións simultáneas na SITE: o programa informático para o control leiteiro de AFRICOR, o servizo informático en rede para produtores agrarios denominado Sirpa que está a ultimar a empresa XAN (ambas as dúas aplicacións desenvolvidas por unha firma xestada no noso viveiro, SCA), o modelo de tecnoloxía analítica NIR coa que traballa a compañía Inversiones Moroan nas granxas leiteiras, o prototipo de tecnoloxía do instituto As Mercedes de Lugo para a produción de auga quente sanitaria e calefacción mediante a recuperación de calor nun tanque de leite e as cámaras de videovixilancia do gando ou as antenas Wimax que instala IGN Solutions.

No acto de clausura participaron os presidentes de AFRICOR LUGO e da Fundación CEL, José Manuel López Tellado e Luis García Santalla; o responsable da Obra Social de Caixa Galicia en Lugo, Sinesio Pérez Rodríguez; e a delegada territorial da Xunta de Galicia en Lugo, Raquel Arias Rodríguez.