Cada vez son máis os libros dedicados especificamente ao protocolo empresarial como ferramenta da imaxe corporativa. Seleccionamos algúns cun enfoque diferente que poden ser proveitosos para consultar dúbidas. Por exemplo, dous básicos do diplomático Jose Antonio de Urbina, El gran libro del protocolo (2001) e 100 preguntas básicas de protocolo (2004), para saber máis de ordenación de convidados, tratamentos, presidencias, organización de actos, etc. Fernando Ramos Fernández, doutor en Ciencias da Comunicación, oriéntase ás pequenas empresas cos casos prácticos de Protocolo y estrategia para pymes. La imagen y la excelencia de los pequeños (2007).

     Un dos últimos en chegar ás librerías foi Protocolo para empresas. La organización de eventos ante las nuevas necesidades en las entidades privadas (2009), no que Gerardo Correas Sánchez integra o protocolo en disciplinas actuais como a responsabilidade social corporativa; do seu anterior libro, La empresa y su protocolo (2004), vendéronse preto de 20.000 exemplares. Por último, sobre a súa fundamentación teórica e a súa historia atopamos información en Protocolo y organización de eventos (2009), de María Teresa Otero Alvarado.