|
A Lei de Servizos da Sociedade da Información e de Comercio Electrónico establece que as empresas ou entidades que sexan titulares dalgún dominio de Internet polo cal perciben ingresos teñen a obriga de comunicalo ao Rexistro Mercantil. Refírese tanto aos ingresos directos como os do comercio electrónico, por exemplo, como os indirectos, como poden ser os obtidos por publicidade ou patrocinio. Para realizar a comunicación é preciso encher un impreso, que se pode obter no Rexistro Mercantil. Nel inclúense os datos da empresa (nome da sociedade, domicilio, localidade e CIF); do representante legal desta (nome e DNI) e do dominio (nome, data de contrato, data de caducidade e entidade rexistradora). O único trámite que implica algún custo para o interesado é a lexitimación notarial da sinatura do representante legal da empresa. O prazo para comunicar un dominio web é dun mes a partir da data da súa obtención. Aínda que a comunicación do dominio só é de obrigado cumprimento para as empresas que perciban ingresos por este, recoméndase que todas as empresas realicen este trámite, xa que o seu custo é mínimo.
|
