|
A sinatura dixital é a equivalente electrónica da nosa sinatura manuscrita. Entre as utilidades da sinatura dixital a nivel empresarial atópanse a presentación de multitude de trámites ante as Administracións Públicas ou a recepción e envío telemático de facturas con total validez legal.
Para poder asinar dixitalmente é preciso dispoñer dun certificado electrónico, a misión da cal é, mediante sistemas de criptografía, validar que unha sinatura electrónica se corresponde cunha persoa ou entidade concreta, verificar a integridade do contido dos documentos asinados dixitalmente e o feito de que o asinante non poida repudiar o contido asinado electronicamente.
O certificado electrónico é emitido por unha das múltiples Autoridades de Certificación, aínda que existen determinadas especificacións técnicas que nos obrigarán a elixir aquela que estea convenientemente acreditada para o uso que se vaia dar. Os pasos para obter o certificado electrónico son simples: solicitude do certificado vía Internet, acreditación da identidade ante algunha das Oficinas de Rexistro, establecida pola Autoridade de Certificación e descarga do certificado vía Internet. No próximo número explicaremos detidamente o proceso incidindo nas diferenzas para unha persoa física e unha entidade. Tal e como adiantabamos a pasada semana, a obtención dun certificado dixital é diferente no caso das persoas físicas e xurídicas. O primeiro paso é común a ambas as dúas. A solicitude debe facerse ante unha entidade de certificación autorizada, como a Fábrica Nacional de Moeda e Timbre. A través da súa páxina web (www.fnmt.es), no apartado CERES, introducindo o DNI (para persoas físicas) ou CIF (para xurídicas) na pestana de solicitude de certificados, obteremos un número de solicitude que é preciso conservar.
Con ese número, debemos dirixirnos a unha Oficina de Rexistro, podendo consultar cál é a máis próxima no localizador do que dispón a web da Fábrica de Moeda.
Neste segundo paso, en caso de ser persoa física, só é preciso presentar o número de solicitude e o DNI.
En caso de persoas xurídicas, a documentación a presentar será: o CIF da sociedade, nota simple do Rexistro Mercantil na que consten os apoderados (tendo en conta que a nota debe ter unha antigüidade inferior a dez días) e o DNI do apoderado que compareza para a realización do trámite. En caso de que o certificado solicitado sexa para o ámbito tributario debemos dirixirnos unicamente ás Oficinas de Rexistro da Axencia Tributaria.
No prazo máximo de 24 horas posteriores á acreditación na Oficina de Rexistro poderemos descargar no noso ordenador o certificado dixital.
|
