Queres darte de alta no boletín de novas tecnoloxías empresariais do SITE?

1-Inaugurado o Centro Galego de Iniciativas Empresariais Innovadoras Femininas (INFEIN)

     Con sede en Vigo, o INFEIN nace dentro do Programa Galego de Muller e Ciencia da Xunta de Galicia para complementar as diferentes liñas de apoio ao emprendemento feminino e de reforzamento da estrutura de recursos humanos e persoal investigador no sistema de I+D+i. No novo centro, aberto oficialmente dende o pasado 16 de outubro, asesorarase e apoiarase ás emprendedoras e ás empresarias galegas para a identificación, o seguimento e a implantación de proxectos e ideas de negocio que inclúan a innovación como vantaxe competitiva.

2-Misión Empresarial Galega a Cuba

     A Consellería de Economía e Facenda, a través do Igape, en colaboración coa Cámara de Comercio de Santiago e a Confederación de Empresarios de Galicia, convoca a Misión Empresarial a Cuba, que vai ter lugar entre o 1 e o 5 de decembro. Esta iniciativa dálle continuidade á viaxe institucional realizada en decembro de 2007 polo presidente da Xunta de Galicia a Cuba, acompañado por unha delegación de empresarios galegos, e á Misión inversa a Galicia. O prazo de recepción de solicitudes remata o 10 de novembro.

3-O calendario laboral de 2009 para a provincia de Lugo

     O Boletín Oficial da Provincia de Lugo (BOP) nº 248, con data do 27 de outubro, recolle o calendario laboral de 2009 coa relación de todos os días festivos locais.

4-Saber dirixir recursos humanos 

     A Escola Universitaria de Relacións Laborais de Lugo, a Fundación Campus Universitario de Lugo e a Escola Galega de Formación organizan a cuarta edición do Máster Paulo Fabio en Dirección de Recursos Humanos. Ten unha duración de 700 horas, carácter semipresencial e unha vocación práctica. Os cinco módulos nos que está estruturado atinxen a organización empresarial, o factor humano na organización, a xestión de recursos humanos, a comunicación empresarial e os riscos e conflitos psicosociais. Os interesados poderán efectuar a solicitude e mais a matrícula do 3 de novembro ao 19 de decembro.