¿Queres darte de alta no boletín de novas tecnoloxías empresariais do SITE?

1-Únete ao proxecto Saeómercado

     A Asociación de Jóvenes Empresarios de Vigo, en colaboración con BIC Galicia, organiza a segunda edición do proxecto Saeómercado de apoio ao emprendedor. O obxectivo deste programa formativo, de carácter gratuíto, é acompañar as novas empresas na súa saída ao mercado, asesorando aos empresarios na definición da estratexia de negocio. O prazo de presentación de solicitudes remata o próximo xoves 2 de outubro.

2-Promoción da igualdade laboral

     A Consellería de Traballo vai destinar 450.000 euros á implantación de plans de igualdade nas pequenas e medianas empresas de Galicia mediante a concesión de subvencións para a realización de estudos da realidade da peme e o financiamento de ata o 75% do custo da asistencia a accións formativas dirixidas ao desenvolvemento dos devanditos plans. Con estas axudas tamén se pretende erradicar a infrarrepresentación feminina no ámbito laboral e fomentar os plans de programación do tempo na cidade. A recepción de solicitudes manterase aberta ata o 15 de outubro.

3-150 millóns máis para as pemes

     O conselleiro de Economía e Facenda, José Ramón Fernández Antonio, vén de anunciar tres novas liñas de financiamento para as pemes galegas, posibles gracias ao convenio pechado coas entidades de crédito e as sociedades de garantía recíproca. O importe estimado ascende a 150 millóns de euros, ampliables, cos que se abranguerán o financiamento de circulante, o refinanciamento de pasivos e as ampliacións de capital.

4-Comercio e hostalería no Plan Urban de Lugo

     O Plan Urban do Concello de Lugo recolle unha partida de 1.500.000 de euros para subvencionar aos establecementos comerciais e hostaleiros do centro histórico e da Rolda da Muralla. Contémplanse axudas tanto para a creación de novos negocios coma para a mellora e a modernización dos xa existentes. Está previsto que se poidan levar á práctica a comezos do 2009.