1-Axudas do Instituto Enerxético de Galicia

      A Consellería de Innovación e Industria, a través do Instituto Enerxético de Galicia, abriu o prazo de presentación das solicitudes ás subvencións para os proxectos de aforro e eficiencia enerxética e para os proxectos de enerxías renovables, convocadas ao abeiro dos convenios subscritos co IDAE en xullo do 2008. As bases reguladoras saíron publicadas no DOG Nº 173, do 8 de setembro.

2-Optimización do tempo na empresa

     Feuga organiza en Santiago de Compostela o seminario “Cómo gestionar nuestro tiempo de manera efectiva”, en resposta á desvantaxe competitiva que lle causa ao empresario unha mala elección de prioridades ante a axenda profesional. Así, proporcionaranse ferramentas prácticas e de aplicación inmediata para optimizar a xestión do tempo e gañar eficacia no traballo. Esta acción formativa terá lugar na sede de Feuga, no campus sur, os días 29 e 30 de setembro, das 9:30 ás 14:30 horas. O prazo de inscrición manterase aberto ata o vindeiro xoves 25 de setembro.

3-Ser xestor da innovación

     O 6 de outubro comeza na capital compostelá o curso “Gestor de la innovación”, no que se abordarán en profundidade os conceptos e as utilidades das técnicas de xestión da innovación no proceso empresarial. A súa duración é de 120 horas lectivas. Esta actividade enmárcase na oferta de formación a distancia de Feuga. Pódese pedir máis información ou realizar as inscricións por teléfono (912 108120/912 108121), por fax (915 765258) ou por email (for@aec.es).

4-XIII Congreso Nacional de Jóvenes Empresarios

     Os empresarios novos teñen unha cita a principios de outubro na Coruña con motivo da celebración do décimo terceiro Congreso Nacional impulsado pola Confederación Española de Asociaciones de Jóvenes Empresarios, nesta ocasión coa colaboración da Asociación Marineda de Jóvenes Empresarios. O programa consta de sesións plenarias e de mesas redondas temáticas a cargo de relatores de recoñecido prestixio, así como dun encontro comercial, actos aos que este ano se suman, como novidade, a montaxe da AJE Exposición Comercial e o desenvolvemento dunha xornada de mentoring.