1-Titorías para emprendedoras

     O Servizo Galego de Promoción da Igualdade do Home e da Muller anunciou a convocatoria pública para a selección de dez empresas que poderán participar no programa de asesoramento e acompañamento individualizado que se vai desenvolver dentro do Plan Emega de apoio ao emprendemento feminino. Poden consultarse as bases no exemplar Nº 171 do DOG, con data do 4 de setembro.

2-Amplíase o prazo xeral para pedir as axudas de promoción do emprego autónomo

     A Consellería de Traballo reabriu ata o vindeiro luns 15 de setembro o prazo xeral para o envío das solicitudes das subvencións dirixidas aos traballadores autónomos ou por conta propia.

3-Incentivos ás empresas de inserción laboral 

     O DOG do 28 xullo recolle as bases dos incentivos que lles vai conceder a Consellería de Traballo ás empresas de inserción laboral (E.I.L.). Considéranse actuacións subvencionables a contratación de persoas en situación ou risco de exclusión social, dos xerentes ou técnicos necesarios para garantir a viabilidade destas empresas e mais de técnicos en accións de orientación e acompañamento á inserción, a realización de labores de mediación laboral, a formalización de préstamos con entidades financeiras e a creación e ampliación do cadro persoal da E.I.L. O prazo de presentación das solicitudes remata o 30 de outubro.

4-A tempo de optar aos Premios Galicia á peme sustentable

     A Consellería de Medio Ambiente e Desenvolvemento Sostible convocou no mes de abril os II Premios Galicia á pequena e mediana empresa sustentable, creados para recoñecer publicamente e recompensar a implementación do desenvolvemento sustentable na actividade produtiva da peme. O prazo para participar vén de ampliarse ata o 1 de outubro (DOG Nº 168). Concederanse tres galardóns, coa súa correspondente dotación económica.