1-O futuro das artes gráficas no punto de mira  

     O Clúster do Produto Gráfico e do Libro Galego, que agrupa máis de cincuenta empresas do sector das artes gráficas, presentou en Santiago de Compostela as novas medidas que vai adoptar a curto prazo co fin de mellorar a competitividade nun mercado globalizado. Destacan o desenvolvemento de varios proxectos de I+D+i, ao abeiro da súa Plataforma Tecnolóxica, e a creación duns premios de deseño galego.

2-Ordenadores para autónomos 

     A Consellería de Innovación e Industria publicou no DOG do 4 de xullo a convocatoria aberta ás empresas interesadas en participar como entidades colaboradoras no proceso de adquisición de ordenadores por parte dos traballadores autónomos. Nunha segunda fase, Industria asinará un convenio con estas empresas e abrirá o prazo para que os autónomos poidan facer as súas solicitudes a través delas. A axuda máxima será de 350 euros por traballador. 

3-“Comerciando na Rede”, unha idea para retallistas   

     No marco das xornadas “Comerciando na Rede”, que se celebraron ao longo desta semana nas catro provincias, a Xunta de Galicia deu a coñecer a súa estratexia de modernización do comercio retallista galego, consistente na posta en marcha dunha plataforma de venda en liña. Nela, os comerciantes poderán introducir información sobre a súa tenda, os seus produtos e as súas campañas de promoción. Trátase dunha iniciativa da Dirección Xeral de Comercio, da Consellería de Innovación e Industria.  

     A Deputación Provincial de Lugo e a Fundación Crea asinaron un convenio para pór en práctica un plan de relevo xeracional nas pequenas e medianas empresas familiares lucenses. O programa habilitado durará dous meses e medio e nel participarán dez pemes, seleccionadas en función das súas posibilidades de sucesión, que contarán co asesoramento de expertos sobre os problemas derivados do proceso de transmisión.