1-Dinamizando o rural galego

     A Axencia Galega de Desenvolvemento Rural vén de convocar no DOG do 2 de xullo as subvencións aos proxectos dinamizadores das áreas rurais de Galicia. Establécense cinco tipos de axuda: para a diversificación cara a actividades non agrarias, a creación e o desenvolvemento de microempresas, o fomento de actividades turísticas, a prestación de servizos básicos para a economía e a poboación rural e maila conservación e a mellora do patrimonio rural. Os interesados poden presentar as solicitudes ata o 29 de agosto. 

2-Apoio ás pemes lucenses para operar na China 

     Logo da súa visita oficial á China, a vicepresidenta da Deputación de Lugo, Lara Méndez, anunciou que as pemes lucenses que desexen instalarse neste país poderán optar gratuitamente a un estudo de viabilidade. Este estudo vai ser realizado por Eurochina Investment, o primeiro polígono industrial en territorio chinés de capital totalmente español, que está previsto que comece a funcionar en setembro preto de Shangai.  

3-Marca Galega de Excelencia en Igualdade 

     A creación deste distintivo responde á intención da Consellería de Traballo de incentivar ás empresas galegas que eliminen a discriminación de xénero, en cumprimento da Lei do Traballo en Igualdade das Mulleres de Galicia. Para poder alcanzar este selo de calidade, as firmas deberán presentar un balance sobre os parámetros de igualdade existentes na súa organización. A posesión da Marca Galega de Excelencia en Igualdade suporálles un valor preferencial nos procesos de adxudicación dos contratos da comunidade.

     O vicepresidente da Xunta, Anxo Quintana, informou dos plans do goberno de creación dun comité de internacionalización das empresas galegas, no que van contar con representación as cámaras de comercio, a Confederación de Empresarios de Galicia e o Igape. Con esta medida preténdese fomentar a actividade exportadora entre as nosas empresas e favorecer a súa competitividade no ámbito internacional.