1-Un pulo económico ao emprendemento feminino 

     O Servizo Galego de Promoción da Igualdade do Home e da Muller publicou no DOG do 24 de xuño as bases reguladoras das subvencións en apoio do emprendemento feminino como fórmula de loita contra a discriminación no mercado de traballo. Enmarcadas no Programa EMEGA, contémplanse dúas liñas de axuda: para a posta en marcha de iniciativas empresariais e para a posta en marcha ou consolidación de iniciativas empresariais innovadoras lideradas por mulleres. O prazo de presentación das solicitudes remata o 24 de xullo.   

2-Tipo de xuro do Igape para o que resta de 2008  

     O DOG Nº 123, do 26 de xuño, recolle o tipo de xuro de referencia para o segundo semestre de 2008 para as operacións acollidas a diferentes convenios e programas de axuda do Instituto Galego de Promoción Económica.  

3-A Consellería de Traballo convocou as axudas ás iniciativas locais de emprego    

     A Consellería de Traballo difundiu no DOG do 27 de xuño as bases e a convocatoria do réxime de subvencións destinadas ás empresas cualificadas como iniciativas locais de emprego (ILES) e mais do programa de iniciativas emprendedoras e de emprego (I+E+E). O prazo xeral de presentación das solicitudes finaliza o 15 de setembro.

     A revista Emprendedores abriu o prazo de participación nos que xa son os seus IV Premios Emprendedores. Establécense dúas modalidades: o Premio Iniciativa ao mellor proxecto de creación de empresa, dotado de 15.000 euros, e o Premio Emprendedores con Enxeño á mellor empresa de recente creación, cuxo gañador recibirá 3.000 euros. Os interesados deberán enviarlle á publicación convocante o cuestionario oficial debidamente cuberto e o seu plan de negocio antes do día 30 de setembro.