Queres darte de alta no boletín de novas tecnolóxicas empresariais da SITE?

 VER BOLETÍN EN ESPAÑOL 

     O DOG do 23 de xuño recolle a convocatoria de subvencións da Consellería de Economía e Industria en desenvolvemento do plan Re-comercia. As axudas irán destinadas, por unha banda, á mellora dos establecementos comerciais retallistas e da súa imaxe (reforma e adecuación de locais, contratación de servizos de escaparatismo, adquisición de mobiliario e equipamento comercial, etc.) e, pola outra, ao fomento da creación e expansión de cadeas sucursalistas de pequeno comercio, así como de establecementos de roupa, calzado e xoias, en locais desocupados de conxuntos históricos oficialmente declarados bens de interese cultural.                            

     A Consellería de Traballo e Benestar difundiu a través do DOG do 24 de xuño as bases reguladoras dos seus programas de fomento do emprego de persoas desempregadas en empresas de economía social e de promoción do cooperativismo. O apoio ao cooperativismo concrétase, á súa vez, en cinco subprogramas: de fomento do emprego en cooperativas e sociedades laborais, de mellora da competitividade en cooperativas e sociedades laborais, de impulso de proxectos empresariais cooperativos e asistencia técnica, de fomento do acceso á condición de socio traballador e, finalmente, para actividades de promoción do cooperativismo, como son a organización de cursos, xornadas e congresos, a presenza en feiras, a elaboración e publicación de estudos e traballos de investigación, etcétera.                                                                                 

     Haberá axudas da Consellería do Medio Rural para a moratoria dos préstamos vinculados coa mellora de explotacións e a incorporación das persoas novas á actividade agraria. Estas axudas facilitaranse aos titulares dos préstamos que acorden coas entidades financeiras unha carencia de ata dous anos de duración na amortización dos devanditos empréstitos. De prazo establécense dous meses.                          

     Con este lema, Sabe o que a Europa Social pode facer por vostede?, a Comisión Europea, a Xunta de Galicia e a Fundación Galicia Europa convocan aos galegos a asistir a esta campaña sobre as accións que emprendeu a Unión Europea en políticas sociais e de emprego e que ten programada a celebración de debates e coloquios sobre o fomento do espírito emprendedor, a integración laboral de persoas con discapacidade, as mulleres do rural e os proxectos financiados co Fondo Social Europeo, así como un obradoiro sobre creatividade e innovación e, para o lecer, música e maxia. Desenvolverase os días 30 de xuño e 1 de xullo no paseo central da Alameda, en Santiago de Compostela.