O vindeiro venres 18 de xuño teredes a oportunidade de participar na Fundación CEL nun taller práctico sobre negociación bancaria e financiamento para pemes que organiza BIC Galicia dentro do seu completo programa de obradoiros para o crecemento e a consolidación empresarial. Este taller leva por título “A estrutura financeira óptima. Identificar necesidades e busca adecuada de fontes de financiamento” e será o socio director da consultoría financeira Arxon Estrategia, Rafael Martínez-Carrasco Samartín, quen vos dea as claves sobre o custo do capital e o rendemento do investimento, o concepto tempo aplicado ao financiamento e a estrutura de capital óptima. Realizaredes casos prácticos e tamén haberá debate. Asistir a esta actividade formativa, que é gratuíta e de catro horas de duración (das 16:30 ás 20:30 horas), axudaravos a definir a estrutura financeira adecuada para asegurar a viabilidade e o equilibrio financeiro da vosa empresa e para manter a correlación de investimento e financiamento nos aspectos de custo e prazo. Para inscribirvos basta con cubrir e enviar on-line o formulario ao que podedes acceder no enlace que engadimos na parte inferior deste boletín. Tamén podedes tramitar a vosa inscrición poñéndovos en contacto con Óscar Díaz Cabado, ben por correo electrónico (oscar.diaz@fundacioncel.org), ben por teléfono (982 284150). O prazo de matrícula remata o día 17. | 
Sala de prensa 
