Queres darte de alta no boletín de novas tecnoloxías empresariais do SITE?

1-Novas liñas de financiamento para pemes

     A Consellería de Economía asinou un convenio con vinte entidades financeiras e coas sociedades de garantía recíproca galegas para pór en marcha tres novas liñas de financiamento para pemes que permitirán mobilizar ata 500 millóns de euros en préstamos preferenciais. Están destinadas ao apoio ao circulante, ao refinanciamento de pasivos e á ampliación de capital social. A aprobación das bases reguladoras vén recollida no DOG do 5 de novembro.

2-O Inludes convoca axudas ás empresas lucenses

     O Instituto Lucense de Desenvolvemento Económico e Social publicou no BOP de Lugo nº 256, con data do 6 de novembro, a convocatoria das subvencións para o acceso á sociedade da información, para a consolidación e mellora do tecido empresarial e para gastos de actividade das empresas lucenses, enmarcadas no Programa de Apoio ao Tecido Empresarial deste organismo. As solicitudes poderán presentarse do 7 ao 21 de novembro.

3-Moratoria do pago da hipoteca a autónomos inactivos

     O presidente do Goberno, José Luis Rodríguez Zapatero, anunciou este luns a concesión dunha moratoria de ata dous anos para o pagamento do 50% das cotas hipotecarias no caso dos desempregados e dos  autónomos con cargas familiares inactivos ou que confirmen o peche do seu negocio. O límite destas hipotecas é de 170.000 euros para os créditos subscritos antes do 1 de setembro de 2008.

4-O Ministerio de Traballo prevé pasar de 2.000 a 3.000 inspectores en catro anos

     O subsecretario do Ministerio de Traballo e Inmigración, Leandro González Gallardo, adiantou en Burgos, a onde acudiu ao VII Plenario da Comisión de Traballo para a Inspección de Traballo e Seguridade Social, que o Ministerio prevé aumentar nun milleiro o número de inspectores no prazo de catro anos, pasando xa que logo de 2.000 a 3.000. Especificou en concreto que para o 2009 a convocatoria prevista roldará as 250 prazas de inspectores e subinspectores.