Queres darte de alta no boletín de novas tecnoloxías empresariais do SITE?

1-A Fundación CEL convoca os seus XI Premios Anuais

     A Fundación CEL abriu a convocatoria da undécima edición dos seus Premios Anuais. Existe novamente a posibilidade de optar a tres categorías: Premios á Iniciativa Empresarial (subdividida á súa vez en tres modalidades: Premio a Proxectos de Creación de Empresa, Premio a Proxectos Universitarios de Creación de Empresa e Premio á Investigación e Innovación aplicada á Empresa), Premios á Actividade Empresarial (con dúas modalidades: Premio á Calidade, Seguridade Industrial e Protección Medioambiental e Premio ao Compromiso Social e á Creación de Emprego) e Premio á Promoción Exterior da Provincia de Lugo. O prazo de presentación das candidaturas permanecerá aberto ata o 31 de xaneiro de 2009.

2-A Deputación de Lugo coas pemes

     A Deputación Provincial de Lugo vai destinar 625.000 euros a unha liña de axudas ás pequenas e medianas empresas, enmarcada no Programa de Apoio ao Tecido Empresarial do Instituto Lucense de Desenvolvemento (Inludes). Esta liña contempla tres tipos de subvencións: ao acceso á sociedade da información e da comunicación, para a consolidación e a mellora do tecido empresarial e para gastos de actividade. Está previsto que as devanditas axudas estean dispoñibles a partir de novembro.

3-Curso avanzado para a definición do negocio

     A Confederación de Empresarios de Galicia, en colaboración coa Consellería de Traballo, pon en marcha por segundo ano consecutivo este curso a través da súa Aula Virtual do Autoemprego, coa intención de que os emprendedores adquiran destreza na identificación e avaliación de proxectos e saiban valorar a viabilidade de cada iniciativa empresarial. O curso, de carácter gratuíto, comeza este luns 27 e dura 60 horas.

4-Claves da xestión empresarial no sector das TIC

     Este xoves 30 de outubro Agestic presenta a acción formativa gratuíta Xestión empresarial avanzada no sector das tecnoloxías da información e a comunicación, dirixida a pemes que traballan coas TIC. Desenvolverase ao longo de cinco xornadas presenciais na Sala de Innovación Tecnolóxica Empresarial (SITE) da Fundación CEL, en horario de 16:00 a 21:00 horas.