Queres darte de alta no boletín de novas tecnoloxías empresariais do SITE?

1-Subvencións da Consellería de Industria

     O 14 de novembro remata o prazo de solicitude das subvencións da Consellería de Innovación e Industria para o fomento do uso das deducións fiscais e das bonificacións na cotización á Seguridade Social por actividades de investigación, desenvolvemento e innovación. As bases polas que se rexerá a concesión destas axudas publicáronse no DOG Nº187, do 26 de setembro.

2-Partidas ministeriais para o rural galego

     A ministra de Pesca, Agricultura e Alimentación, Elena Espinosa, anunciou que o seu departamento vai repartir preto de 160 millóns de euros para proxectos das comunidades autónomas, dos cales unha partida de 23 millóns vai destinada a programas agrarios e de desenvolvemento rural de Galicia. Esta cuantía abranguerá a promoción e diversificación no medio rural, medidas medioambientais, o impulso das novas tecnoloxías na produción agrícola ou o fomento da produción agroalimentaria e de calidade de orixe animal, entre outras accións.

3-Celebración do Foro da Innovación en Lugo

     O 4 de novembro chega a Lugo o Foro da Innovación, un evento que vén organizando en distintas cidades españolas o Consejo Superior de Cámaras de Comercio e que aquí conta coa colaboración do Consello Galego de Cámaras e da Cámara de Lugo e co apoio da Consellería de Innovación e Industria. O seu obxecto é promover a adopción dunha cultura innovadora nas pemes galegas, para as que se programaron un relatorio sobre casos exitosos de empresas innovadoras e unha feira da innovación. A cita é no auditorio da Facultade de Veterinaria, das 9:30 ás 14:00 horas.

4-O Nobel de Economía para Paul Krugman

     A Real Academia Sueca das Ciencias outorgoulle o Premio Nobel de Economía de 2008 a Paul Krugman (Nova York, 1953), profesor de Economía e Asuntos Internacionais na Universidade de Princeton, cofundador da nova teoría do comercio internacional e coñecido crítico do neoliberalismo económico.