Queres darte de alta no boletín de novas tecnoloxías empresariais do SITE?

1-Os autónomos xa poden solicitar as subvencións para a compra de equipamento informático

     O DOG Nº 195, do 8 de outubro, recolle a resolución da Consellería de Innovación e Industria pola que se abre ata o 10 de novembro de 2008 o prazo de presentación das solicitudes ás axudas que se lles conceden aos traballadores autónomos para a compra de ordenadores persoais a través dalgunha das 32 entidades colaboradoras coa devandita Consellería. Entre estas entidades figura a empresa IGN Solutions, con sede no viveiro da Fundación CEL. A subvención pode cubrir ata o 45% do importe do equipo informático, cun máximo de 350 euros.

2-A USC organiza o I Emporium Woman Emprende

      A Universidade de Santiago de Compostela (USC) ten como un dos seus obxectivos incrementar o número de vocacións empresariais entre as estudantes. Por este motivo, os días 23 e 24 de outubro vai celebrar no Salón Noble de Fonseca o I Emporium Woman Emprende, un encontro a prol do emprendemento universitario feminino que servirá para crear a Red Woman Emprende e mais para formar o Fondo Woman Emprende de Capital Riesgo.  

3-Difusión do selo Calidade do Comercio Galego en
Lugo

     A Sala de Innovación Tecnolóxica Empresarial (SITE) vai acoller o vindeiro martes 14 de outubro, das 19:00 ás 21:00 horas, unha xornada de difusión do selo Calidade do Comercio Galego, implantado recentemente pola Dirección Xeral de Comercio como elemento diferenciador dos comercios retallistas. Está dirixida en especial aos comerciantes dedicados á venta e á instalación de equipos informáticos, de medios audiovisuais e de material de oficina, aos que se informará sobre os requisitos, os trámites e as vantaxes da adscrición a este distintivo.

4-Acudir como empresa á I Feira Europea do Emprego 

     A Universidade da Coruña está a preparar a I Feira Europea de Emprego, unha sorte de foro no que empresas, institucións, emprendedores e estudantes abordarán dende diferentes enfoques un único tema: o mercado laboral no espazo europeo de libre circulación de traballadores. As empresas que desexen participar disporán dun posto propio para presentar os seus programas de emprego e de prácticas e para captar currículos e mesmo realizar probas de selección de persoal, entre outras actividades. A cita será o 6 e o 7 de novembro no campus de Elviña.