Queres darte de alta no boletín de novas tecnoloxías empresariais do SITE?

1-Aboamento de cotas á Seguridade Social

     O DOG Nº 176, con data do 11 de setembro, recolle a orde pola que a Consellería de Traballo establece o procedemento de aboamento de cotas á Seguridade Social a traballadores que percibisen a prestación por desemprego na súa modalidade de pagamento único e convoca as axudas correspondentes.

2-Traballadoras embarazadas na empresa

     A Consellería de Traballo vai subvencionar o custo empresarial da adaptación dos postos de traballo con risco para as embarazadas e para as  mulleres que deran a luz recentemente ou que estean no período de lactancia. Trátase dunha medida recollida polo decreto de regulación do Consello Galego de Participación das Mulleres no Laboral, organismo de constitución recente. O importe destas axudas poderá ser de ata o 50% do custo total, chegando ata o 75% no caso de que a empresa non supere un volume de negocio de 600.000 brutos anuais ou se concorren motivos especiais de fomento do emprego feminino.

3-Acordo pola Competitividade de Galicia 2008-2010

     O Acordo pola Competitividade de Galicia 2008-2010 aúna diferentes medidas para o impulso e a modernización empresarial, cuxos orzamentos deu a coñecer a Consellería de Traballo. Destacan, entre outras actuacións, os programas de apoio aos emprendedores, para os que destina 35 millóns de euros; o desenvolvemento de iniciativas emprendedoras e de emprego e de iniciativas locais de emprego, presupostado en 8 millóns de euros; e o impulso á inserción de titulados universitarios e con formación profesional especializada en novos postos de traballo creados nas pemes galegas, cunha asignación de 3 millóns de euros.

4-Crear innovación empresarial 

     Feuga programou un obradoiro de creatividade para a innovación empresarial, titulado “Innovación desde o interior”, para os días 13, 14, 20 e 21 de outubro na súa sede de Santiago de Compostela. A formadora Kim A. Page, especializada en comunicación non verbal e interactiva, será a encargada de estimular unha actitude innovadora nos asistentes mediante a exploración dos elementos básicos do proceso creativo e a práctica de habilidades para integrar diferentes contidos con distintos formatos nun concepto. A matrícula neste taller é gratuíta, porén, existe un máximo de 20 prazas dispoñibles. A data límite de inscrición é o martes 7 deste mes.