Queres darte de alta no boletín de novas tecnolóxicas empresariais da SITE?

 VER BOLETÍN EN ESPAÑOL 

     O Igape lanzou as súas axudas ao programa Innoempresa de apoio á innovación das pequenas e medianas empresas galegas, que poderán solicitarse ata o 9 de xullo e das que poderán beneficiarse os promotores de distintos tipos de proxectos, como por exemplo de modelos empresariais innovadores, deseño de novo produto, proxectos de desenvolvemento tecnolóxico aplicado, implantación e certificación das normas UNE 166.001 e 166.002 e de sistemas de xestión ambiental ou proxectos de identificación de necesidades tecnolóxicas, desenvolvemento de solucións técnicas e organizativas comúns e utilización de servizos avanzados compartidos por grupos de pemes. A orde coas bases reguladoras foi publicada no DOG deste venres 28.                       

     A Consellería de Economía e Industria deu a coñecer no DOG do 24 de maio as bases para o acceso a formación especializada en xestión da innovación dentro da Rede de Xestores da Innovación de Galicia (XIGA), por unha banda, e para a concesión de subvencións ás pemes galegas para financiar os custos laborais da contratación deste persoal formado na Rede, pola outra. Tamén este departamento informou da resolución da convovatoria das subvencións ao fomento do uso das deducións fiscais e das bonificacións na cotización á Seguridade Social por actividades de investigación, desenvolvemento e innovación.                                                                       

     Esta semana, o Congreso dos Deputados aprobou o subsidio por desemprego para os traballadores autónomos. Aqueles que cotizaran menos de 43 meses terán medio ano de prestación, os que o fixeran entre 43 e 48 meses terán oito meses e os que cotizaran máis de 48 meses terán dereito a unha prestación por desemprego dun ano, que é o máximo establecido.                                                                     

     Este ano celébrase o décimo aniversario da declaración da Muralla Romana de Lugo como Patrimonio da Humanidade pola UNESCO, distinción que marcou a historia da cidade en termos de turismo e dinamización socioeconómica. Lugo10 é unha iniciativa que parte do Concello para conmemorar este acontecemento, en colaboración con varias empresas. Dende a Fundación CEL queremos brindarlle o noso apoio a Lugo10 sumándonos á súa promoción a través do enlace coa súa páxina web. Animamos a todas as empresas membro da Fundación e mais ás empresas do noso viveiro a colaborar tamén na divulgación da imaxe de Lugo a través dos seus portais.